arkiva

"Fluturimi mbi Teatrin e Kosovës" në Teatrin Shtetëror të Stambollit

Komedia “Fluturimi mbi teatrin e Kosovës” (Geçtim Ama Tiyatrodan) e autorit kosovar Jeton Neziraj, është duke u inskenuar në Teatrin Shtetëror të Stambollit. Ajo është bërë pjesë e repertorit teatror 2014/2015 dhe premierën do ta ketë me datë 7 tetor. Vetëm gjatë muajit tetor janë paraparë 14 shfaqje, ndërsa repriza të radhës do të ketë përgjatë krejt sezonit teatror.
Komedia në turqisht është përkthyer nga Senem Cevher, e cila edhe ka përkthyer shumicën e dramave tjera të dramaturgut kosovar Jeton Neziraj.
Regjine shfaqjes është duke e bërë regjisori i mirënjohur turk Atilla Şendil, kurse do të luajnë e aktorët: Ozan Dağara, Selçuk Kıpçak, Gamze Yapar Şendil, Cengiz Baykal, Şahin Çelik.
Kjo është drama e dytë e Nezirajt e cila luhet në teatrot e Stambollit. Në fillim të këtij viti atje nga teatri BO Sahne është inskenuar edhe tragjikomedia “Yue Madeleine Yue”.
“Fluturimi mbi teatrin e Kosovës”, është një satirë politike për shtetin e sapolindur të Kosovës, i cili i dërmuar nga lufta, varfëria, korrupsioni dhe mbrojtja e përhershme e ndërkombëtarëve, përpiqet të gjejë vet rrugën kah e ardhmja.
“Fluturimi mbi teatrin e Kosovës” për herë të parë është vënë në skenë në dhjetor të vitit 2012, në Prishtinë, nga Qendra Multimedia. Produksioni Kosovar i kësaj komedie ka pasur dhjetëra repriza të suksesshme në Kosovë, Serbi, Maqedoni, Shqipëri e Slloveni, kurse deri në fund të këtij viti do të shfaqet edhe në Itali e Zvicër.