Me 6 prill 2018 në Teatrin Kombëtar të Kosovës në Prishtinë, u mbajt promovimi i librit biografik në gjuhën shqipe, i aktorit të madh shqiptar “Aleksandër Moisiu. Trieshtë – Berlin – Nju Jork . Një legjendë aktrimi” nga autori gjerman Rüdiger Schaper. Promovimi i librit të njëjtë po ashtu u mbajt në Pejë me 7 prill 2018, në Bibliotekën e Qytetit Azem Shkreli.
Ky libër erdhi si projekt i përbashkët i Qendrës Multimedia në Prishtinë, Shtëpisë Botuese PA dhe Traduki dhe u botua në nëntor të vitit të kaluar. Libri është promovuar në Berlin në fillim të muajit mars dhe tani edhe në Kosovë.
Në promovim të librit ishin të pranishëm autori Rüdiger Schaper dhe përkthyesja Feride Xh. Berisha. Autori u shpreh i kënaqur që libri është përkthyer edhe në gjuhën shqipe. Ai lexoi pjesë nga shkrimi i tij dhe u përgjigj pyetjeve të rastit të të pranishmëve.