Rreth shfaqjes:

Aeneas 06 është një projekt i iniciuar nga Jeton Neziraj dhe Michael Devine në tetor të vitit 2005. Projekti u krijua nga interesi për të eksploruar qasjet që dy dramaturgë nga kultura të ndryshme mund t’i merrnin ndaj legjendës së Eneut. Eneida u zgjodh si bazë nga autorët për shkak të lidhjes së saj historike me tokën e ilirëve, si dhe për shkak të përdorimit të saj nga romakët si një lloj teksti themelor për identitetin e tyre kombëtar.

Çështjet e shtetësisë, kombësisë dhe identitetit kulturor janë gjithmonë me interes të madh në Ballkan, e sidomos në Kosovë. Qëllimi nuk ishte të krijoheshin tekste polemike, por të shtroheshin pyetje rreth asaj se çfarë kuptimi kanë këto terma dhe si përdoren ato. Në këtë kuptim, dramat janë politike, ashtu siç janë të gjitha dramat me përgjegjësi; jo në kuptimin e marrjes së një ane dhe demonizimit të tjetrës, por duke paraqitur çmimin që paguajnë të gjitha palët në konfliktet e identitetit…