Edicioni i 4-të i Kosovo Theatre Showcase vazhdon programin e fundjavës të shtunën më 6 nëntor me shfaqjet e produksionit vendor dhe atij ndërkombëtar të cilat performohen në Prishtinë dhe Ferizaj.

Programi i së shtunës fillon në orën 11:00 në Teatrin Oda në Prishtinë me shfaqjen “Audienca e Vaclav Havelit” nga Jeton Neziraj në regji të Agon Myftarit. “Audienca” shpërfaq paradokset burokratike të shtetit autoritar që përdoren për të shantazhuar e për të vënë në kurth secilin që shteti e konsideron jo të bindur si dhe ata që refuzojnë ti bashkangjiten sistemit. Në shfaqje luajnë: Shpëtim Selmani dhe Dukagjin Podrimaj.

Programi i së shtunës vazhdon në orën 15:00 në Teatrin “Adriana” në Ferizaj ku ipet shfaqja “Fuego” nga Shpëtim Selmani në regji të Fadil Hysajt. “Fuego” është një nga dramat e rralla në gjuhën shqipe që i adreson çështjet e mëdha me një qasje minimaliste dramaturgjike. Ngjarja është e vendosur në një dyqan riparimi ku zhvillohet një konflikt në mes të një burri e një djaloshi për një kusur prej 3 eurosh që burri nuk mund të ia kthejë djaloshit pas rregullimit të një nxemëseje. Në këtë shfaqje luajnë: Bajrish Mjaku e Shpëtim Selmani.

Programi i së shtunës përfundon në Teatrin Oda me shfaqjen mysafire nga Zvicra “Jetë e dyfishtë” nga Daniela Janjić në regji të Maike Lex që fillon në orën 20:00. Shfaqja është produksion i kompanisë teatrore Schlachthaus Theater Bern në bashkëpunim me Theater Winkelwiese (Zurich), Qendra Multimedia (Prishtina) dhe Theater Kosztolányi Dezső (Subotica). Në shfaqje luajnë: Patricija Bronić, Dávid Búbos, Boris Kučov dhe Albulena Kryeziu.

Për pesë ditë me rradhë, Showcase-i i këtij viti mbledh në Kosovë, rreth 50 drejtues festivalesh, kritikë, gazetarë e profesionistë të tjerë të teatrit nga rajoni e bota të cilët do të kenë mundësinë të shohin prodhimtarinë më të fundit teatrore në Kosovë, të prezantojnë punën e tyre si dhe të flasin për çështje të tjera që kanë të bëjnë me teatrin.

Këtë vit Showcase-i prezenton 10 performanca teatrore nga Kosova dhe rreth 4 të tjera nga rajoni dhe Evropa ―në një program përcjellës të shfaqjeve mysafire të titulluar “Programi i vendeve pa regjim vizash”.

Kosovo Theatre Showcase organizohet nga Qendra Multimedia në bashkëpunim me Teatrin Kombëtar të Kosovës, Teatrin e Qytetit në Gjilan, Teatrin “Adriana” në Ferizaj dhe teatrin “Dodona” në Prishtinë.

Për të parë programin e plotë, ju lutem vizitoni linkun më poshtë: https://qendra.org/kosovo-theatre-showcase-2021-draft-program/

Për kërkesa rreth intervistave e ftesave në studio lidhur me këtë ngjarje, ju lutem na shkruani në adresën: [email protected]