Përmes thirrjes për Rezidencat Artistike Reconnection 2.0, të shpallur në kuadër të projektit Reconnection 2.0 të financuar nga Bashkimi Evropian, menaxhuar nga Zyra e Bashkimit Evropian në Kosovë dhe zbatuar nga Qendra Multimedia (Prishtinë) e Heartefact Fund (Beograd), dy artistet Marija Kalabić dhe Anja Drljević kanë përfituar secila nga një rezidencë artistike një-mujore në Prishtinë përgjatë muajit maj. Skenografja Marija Kalabić dhe aktorja Anja Drljević aktualisht po punojnë të dyja në projektin teatror The Handke Project.
Marija Kalabić u lind më 1972 në Beograd. Në vitin 2006 ka mbaruar studimet për arkitekturë në Universitetin e Beogradit. Me skenografi është marrë që nga viti 1997 dhe ka realizuar mbi 150 skenografi për shfaqje të ndryshme teatrore. Në vitin 2003 është anëtarësuar në ULUPUDS (Shoqata Serbe e Dizajnerëve dhe Arteve Aplikative). Ka realizuar një numër ekspozitash dhe nga viti 2005 deri më 2016 ka ligjëruar në Fakultetin e Arkitekturës në Universitetin e Beogradit. Nga viti 2008 është e punësuar në Teatrin Kombëtar të Suboticës.
Anja Drljević u lind më 1993 në Nikshiq të Malit të Zi. Ka mbaruar studimet për aktrim në Akademinë e Arteve Skenike në Sarajevë - Bosnjë e Hercegovinë. Deri më sot ka luajtur në disa shfaqje teatri e filma të prodhuar në rajon. Aktualisht jeton dhe punon në Beograd.